У гэтага паняцця ёсць і іншыя значэнні, гл. Вольскі (значэнні).

Лявон Вольскі
Асноўная інфармацыя
Поўнае імя	Леанід Артуравіч Зэйдэль-Вольскі
Дата нараджэння	14 верасня 1965(1965-09-14) (53 гады)
Месца нараджэння	Мінск, БССР, СССР[1]
Краіна	Беларусь
Бацька:	Артур Вольскі
Маці:	Святлана Георгіеўна Яўсеева
Музычная дзейнасць
Прафесіі	мастак, пісьменнік, паэт, спявак, журналіст, аўтар-кампазітар
Гады актыўнасці	1981 — цяперашні час
Інструменты	гітара, клавішныя
Жанр	рок
Псеўданімы	Kanzler
lavonvolski.com
Выявы на Вікісховішчы
Цытаты ў Вікіцытатніку

Ляво́н Арту́равіч Во́льскі (сапраўднае імя — Леанід Артуравіч Зэйдэль-Вольскі^[2]; 14 верасня 1965, Мінск) — беларускі музыкант, літаратар, мастак, вядучы. Заснавальнік «Мроі», N.R.M. і «Крамбамбулі». Таксама граў і спяваў у гуртах «Новае Неба» і «Zet».

З'яўляецца сынам беларускага пісьменніка Артура Вольскага і рускай паэтэсы Святланы Яўсеявай. Унук пісьменніка Віталя Вольскага-Зэйдэля.

Біяграфія |

Скончыў Мінскае мастацкае вучылішча (1984), у час навучання быў адным з заснавальнікаў гурта «Мроя» (1982). Удзельнічаў у маладзёжным грамадскім аб'яднанні «Беларуская Майстроўня» (1979—1984).

У 1994, пасля некаторых змен у складзе, ініцыяваў пераўтварэнне «Мроі» ў гурт «N.R.M.» («Незалежная Рэспубліка Мроя»), у якім па-ранейшаму выступаў як асноўны аўтар музыкі і тэкстаў песень. У 1990—1998 таксама выступаў як выканавец на клавішных у гурце «Новае Неба». У 2001 быў ініцыятарам стварэння гурта «ZET». У канцы 2004 у складзе гурта «Крамбамбуля» выступаў на плошчы Незалежнасці ў Кіеве. Працаваў вядучым аўтарскай праграмы «Квадракола» на радыёстанцыях «Беларуская маладзежная» і «101,2».

У 1997 напісаў музыку і аранжоўкі большасці кампазіцый для сумеснага музычнага праекту «Народны альбом», удзельнічаў у падрыхтоўцы, запісе і паказе сумесных музычных праектаў «Сьвяты вечар 2000» і «Я нарадзіўся тут» (2001). На працягу 2002—2007 распрацаваў і напісаў вялікую частку песень для праграм «Крамбамбуля», «Крамбамбуля 11/2: Каралі раёну», «Крамбамбуля 0,33 FM», «„Крамбамбуля“ сьвяточная». Сярод найболей вядомых песень Л. Вольскага: «Песьні пра каханьне», «Тры чарапахі», «Партызанская», «Паветраны шар», «Лёгкія-лёгкія», «Я нарадзіўся тут», «Абсэнт», «Госьці».

Сумесныя праекты з удзелам Лявона Вольскага — «Народны Альбом» і «Я нарадзіўся тут» — сталі ў Беларусі культавымі.

Выступае ў друку як паэт, празаік, журналіст. Аўтар зборнікаў паэзіі «Калідор» (1993), «Фотаальбом» (1998).

У складзе розных калектываў быў на гастролях у Польшчы, Украіне, Францыі, Даніі. Удзельнік, у складзе розных калектываў, фестываляў «Рок-крок 1987, 1988», «Наваполацк 1988», «Рок-дыялог» (Магілёў, 1988, 1989), «Днепродержинск 1989», «Тры колеры» (Мінск, 1990), «Басовішча» (неаднаразова — Гродэк, Польшча), «Belfort-Fimu» (Бельфор, Францыя, 1993), «Фестываль народных меншасцей» (Гдыня, Польшча, 1993), «Rock-mafia» (Сопат, Польшча), «Roskilde» (Данія, 1993) і інш.

30 снежня 2009 года выйшаў дыск «Такога няма нідзе», усе песні якога сачыніў Вольскі і запісаў іх з шэрагам музыкаў (Русяй, Алегам Хаменкам, Уладзімірам Пугачам ды іншымі)^[3].

Альбом «Гравітацыя», прэзентаваны ў Мінску 2 сакавіка 2019 года, завяршыў трылогію, пачатую дыскамі «Грамадазнаўства» (2014) і «Псіхасаматыка» (2016). «Гравітацыя» храналагічна распавядае пра ўсе асноўныя стадыі жыцця чалавека: ад нараджэння да смерці. Рэжысёрамі кліпаў на песні з яго сталі Арцём Лобач («Лепшыя на свеце») ды Елізавета Ганчарова («Човен»). Як і папярэднія альбомы, ён быў запісаны ў Вільні. Сродкі на запіс і выпуск збіраліся праз краўдфандынг^[4].

На Новы 2019 год сыграў у музычным шоу «Нас у Маскве не зразумеюць» Тузін Гітоў, «Belsat Music Live» ды Лявона Вольскага.^[5][6]

Прызнанне |

Прызёр глядацкіх сімпатый на фестывале «Рок-крок 1988»; лаўрэат фестывалю «Наваполацк 1988»; Гран-пры, прыз у намінацыі «Лепшы клавішнік» на фестывале «Тры колеры 1990»; «Рок-кароны» ў намінацыях «Песня году» («Партызанская») — 1996, «Альбом году» («Народныя альбом») — 1997, «Рок-карона 1997», «Праект году» («Сьвяты вечар 2000») — 1999, «Песня году» («Паветраны шар») — 1999, «Музыка году», «Падзея году» (праект «Я нарадзіўся тут»), «Лепшыя тэксты», «Песня году» («Тры чарапахі»), «Альбом году» («Тры чарапахі»), «Рок-карона» — усё 2000, «Выканаўца году» на «Рок-каранацыі 2004—2005».

Дыскаграфія |

Сольныя альбомы |

• 
  Куплеты і прыпевы (2008)


• 
  Белая яблыня грому (2010)


• 
  Грамадазнаўства (2014)


• 
  Псіхасаматыка (2016)


• 
  Гравітацыя (2019)

Сумесныя праекты |

• 
  Народны Альбом (1997)


• 
  Сьвяты Вечар 2000 (1999)


• 
  Я нарадзіўся тут (2000)


• 
  Прэм'ер Тузін 2005 (2005)


• 
  Прэм'ер Тузін 2006 (2006)


• 
  НезалежныЯ (2008)


• 
  Такога няма нідзе (2009)

Літаратурныя творы |

• Міларусь : апавяданні, аповесць / Лявон Вольскі.— Мінск, 2011. (Форма імя: Вольскі Лявон Артуравіч.)


• Народны альбом : п'еса / Міхаіл Анемпадыстаў, Лявон Вольскі. — Мінск, 2008.

Зноскі

Літаратура |

• Вольский Лявон // Кто есть кто в Республике Беларусь: Электронный справочник; БДГ on-line. — Эл. ресурс bdg.by


• Энцыклапедыя беларускай папулярнай музыкі — Мінск, 2008.


• 
  Дубавец, С. Майстроўня. Гісторыя аднаго цуду / Сяргей Дубавец ; фота А. Канцавога. — [Б. м.] : Радыё Свабодная Еўропа / Радыё Свабода, 2012, — 457 с.

Спасылкі |

У Вікіцытатніку ёсць старонка па тэме Лявон Вольскі

• 
  На Вікісховішчы ёсць медыяфайлы па тэме Лявон Вольскі
  


• 
  www.lavonvolski.com — афіцыйны сайт Лявона Вольскага


• Афіцыйны блог lvolski — Лявон Вольскі у Жывым Журнале
  


• «Асабістая справа» на афіцыйнай хатняй старонцы N.R.M.(Копія з web.archive.org)


• КУЛЬТурныя людзі: Лявон Вольскі